दोलखाः नेकपा  एमाले दोलखाले पार्टीको अध्यक्ष पूनः केपी शर्मा ओलीनै हुनुपर्ने निर्णय गरेको छ । जिल्ला कमिटीको नवौं पूर्ण बैठकले ओलीले नै पार्टीको नेतृत्व गर्नुपर्ने निर्णय गरेको हो ।

साथै बैठकले प्रतिशोधको भावनाले सरकारले ओलीलाई स्थान हद गर्ने, बयान लिने, पक्राउ गर्ने, हिड्डुल र राजनीतिक गतिबिधिमा अवरोध गर्ने तयारी गरेकोमा आपत्ति प्रकट गर्दै त्यसको प्रतिरोध गर्ने निर्णय समेत गरेको छ । आइतबार पत्रकार सम्मेलनको आयोजना गर्दै एमाले दोलखाले सो निर्णय सार्वजनिक गरेको हो ।

बैठकले ओली अध्यक्षमा रहिरहनु पर्छ भन्ने निर्णय गर्दै भनेको छ– ’नेकपा एमालेको अभिभावकको रुपमा रहेको राष्ट्रवादी नेता केपी शर्मा ओली नै वर्तमान नेपालको राजनीतिक नेतृत्वमा र पार्टीको अध्यक्षमा रहिरहनुपर्ने अपरिहार्यता रहेको बैठकले ठहर गरेको छ ।’

साथै बैठकले विगतमा एमालेमा रहेर योगदान गरेका नेता कार्यकर्तालाई गर फर्किन पनि आव्हान गरेको छ ।