साताभरिको नेप्सेमा ५२ अंकको गिरावट, सबै उपसूचकहरू राताम्मे

काठमाडौँ, १४ असार: यो साता नेपाल स्टक एक्सचेन्ज परिसूचकमा १.९५ प्रतिशतको गिरावट आएको छ। गत साता २,७०२.११ विन्दुमा बन्द भएको बजार यो साता ५२.६० अंकले घटेर २,६४९.५१ विन्दुमा ओर्लिएको हो। साताभर बजारमा उच्च उतारचढाव देखिँदा परिसूचक अधिकतम २,७१९.१६ र न्यूनतम २,६३३.९३ विन्दुको बीचमा घुमिरह्यो। साताको सबैभन्दा ठूलो एकल गिरावट मंगलबार २६.१७ अंकको भयो। बजार ओरालो लागे पनि साताभर कुल २० अर्ब १ करोड रुपैयाँ बराबरको ४ करोड ३१ लाख कित्ता सेयर खरिदबिक्री भएका छन्, जसले बजारको कुल पूँजीकरण ४५ खर्ब ३४ अर्ब रुपैयाँ कायम गरेको छ।

प्राविधिक सूचक आरएसआई दैनिक चार्टमा २५.८८ को स्केलमा ओर्लिएर बजार 'ओभरसोल्ड' क्षेत्रमा पुगेको संकेत गरेको छ। सूचकहरू ५ दिने र २० दिने मुभिङ एभरेजभन्दा तल रहनुले बजारमा बियरिस सेन्टिमेन्ट हाबी भएको देखिन्छ। अब बजारका लागि २,५८५ को तह मुख्य सपोर्ट र २,७८५ को क्षेत्र मुख्य रेजिस्टेन्स हुने विश्लेषण गरिएको छ। यस साता सबै उपसूचकहरू ऋणात्मक रहे। कम्पनीगततर्फ आँखुखोला जलविद्युतको सर्वाधिक १ अर्ब ६ करोडको कारोबार भयो भने टक्सार पिखुवा खोला हाइड्रोपावरको मूल्य १०१.०७ प्रतिशतले बढेर साताकै शीर्ष कमाउने कम्पनी बन्यो। अर्कोतर्फ, बङ्गाल हाइड्रो लिमिटेडको मूल्य १४.८४ प्रतिशतले घट्दै साताको उच्च नोक्सानी व्यहोर्ने कम्पनी बन्यो।