नेपाल राष्ट्र बैंकले बैंकिङ प्रणालीबाट आज एक खर्ब रुपैयाँ तरलता खिच्ने भएको छ। आइतबार राष्ट्र बैंकको मौद्रिक व्यवस्थापन विभागले सूचना प्रकाशित गर्दै २१ दिनका लागी १ खर्ब रुपैयाँ निक्षेप संकलन गर्न लागेको जानकारी दिएको हो । निक्षेप संकलन उपकरण बोलकबोलमार्फत आज १ खर्ब रुपैयाँ तरलता खिच्न लागेको हो।

 दिउँसो ३ बजेसम्म हुने बोलकबोलमा घटीमा १० करोड र बढीमा ५ करोड रुपैयाँले भाग गर्दा निःशेष भाग जाने  रकमसम्म आवेदन दिन सक्नेछन्। निक्षेपबापत राष्ट्र बैंकमा जम्मा गर्न लागेको रकम र ब्याजदरमा विषयमा बोलकबोल विधिबाट प्रस्ताव पेस गर्न क, ख, ग र घ वर्गका बैंक तथा वित्तीय संस्थालाई राष्ट्र बैंकले आह्वान गरेको छ । 

अन्तर बैंक ब्याजदरलाई ३ प्रतिशतको सीमा राख्नुको साथै बैंकमा अधिक तरलता भएर हुन सक्ने अन्धाधुन्ध कर्जा लगानीलाई रोक्न राष्ट्र बैंकले ३ प्रतिशतसम्म ब्याज दिँदै निक्षेप संकलन गर्न लागेको हो । चालू आर्थिक वर्षमा राष्ट्र बैंकले ब्याजदर करिडोर सम्बन्धी नीतिलाई नियमित रुपमा कार्यान्वन गराउने प्रयास गर्दै आएको छ ।